AFIT/Antropologia Feminista Ikerketa Taldea 80ko hamarkadatik aurrera euskal gizartean egindako talde lanaren oinordekoa da. Lan hori, Teresa del Valle antropologoak gidatua, ikerketa antropologiko feministan aitzindaria da Espainiako Estatuan.

AFIT Euskal Unibertsitate Sistemaren Talde gisa sortu zen 2013an, gizarte antropologian eta feminismoan espezialistak ziren kideak elkartuz, elkarrekin lanean aspaldi zebiltzanak, ikerketan zein irakaskuntzan. Talde horri, ondoren, soziologia feministan adituak ziren kideak ere gehitu zitzaizkion. Lan lerro hori UPV/EHUn ondo finkatutako beste espezialitateetakoa zen, haiek ere elkarrekin lan egiten ohituak, bai irakaskuntzan (gradua, masterra eta doktoregoa), bai ikerketan (proiektuak eta kontratuak, eta kongresu eta bilera zientifikoen antolaketa).

Gure ikerketa-eremu orokorra gizarte eta kultura prozesuak dira, eta arreta berezia jartzen dugu gizarte eta genero desberdintasunen azterketan zein gizarte eraldaketan. Gure ikerketa-ildoak lau dira:
(1) Egungo krisialdi sozio-ekonomiko eta sanitarioaren testuinguruan gertatzen diren ezberdinkeria eta gizarte-bazterketa prozesuak.
(2) Berdintasun politikak eta politika feministak, hainbat esparrutan.
(3) Gizarte-mugimenduak, praktika politikoen birkonfiguratzea, aliantzak eta gatazkak.
(4) Emozioak, gorputz-praktika eta politikak eta berrikuntza metodologikoak.

Askotariko gaiak jorratzen ditugu, gaurkotasun handiko arazo eta eztabaidei erantzuten dietenak (zaintzei, migrazioei, zahartzeari, hizkuntza-politikei, maitasun-harremanei edo sexu eta genero disidentziei buruzko politikak, batzuk aipatzearren). Ikerketa, argitalpen, doktoretza-tesi eta gizartera transferitzeko jarduera ugari egin ditugu eta, proiektu lehiakorrak inplementatzeaz gain, aliantzak egiten ditugu eta kontratuak sinatzen ditugu askotariko gizarte-erakundeekin eta hirugarren sektorekoekin, baita administrazio publikoekin ere (Eusko Jaurlaritzako sailak, foru-aldundiak edo udalak, besteak beste).

Gure berezitasunak marko teoriko eta metodologiko feminista (antropologia, soziologia eta gizarte lanean), zein  triangulazioa eta berrikuntza metodologikoa dira. Ekarpen metodologiko esanguratsuak egiten ari gara, bai epistemologia feministaren mailan, bai gorputz-etnografia deritzonaren mailan.

Talde aitzindaria gara Euskal Herrian, eta erreferentzia gara bertan zein kanpoan, generoaren eta sozioantropologiaren arloko espezialisten hainbat saretan.