Deskribapena

 

Koronabirus delakoak eragindako egoera eta horren inguruan dauden aurreikuspenak kontuan hartuta, 2020ko ekainaren 3-5ean gertatzekoa zen Antropologia Feminista Kongresuaren Batzorde Antolatzailea bildu gara gaur. Hainbat aukera aztertu ondoren, urtebete atzeratzea eta 2021eko ekainean egitea erabaki dugu.

Sentitzen dugu erabaki honek  ekar ditzakeen eragozpenak.

 

      

Antropologia feminista XX. mendearen hirurogeita hamarretan sortzen da, nahiz eta lehenago ere hainbat aurrekari esanguratsu egon. Testuinguru historiko eta geografikoen arabera, izen eta garapen teoriko-metodologiko ezberdinak (izan) dituen eredu teorikoa da, mota guztietako gai eta azterketa-arloetan aplikagarria.

Bere helburu nagusietako bat diziplina barruko zein kanpoko ezagutza eta errealitatea aldatzea da eta horretarako ezarritakoari aurre egin behar zaio eta deserosotasuna apustu kontzeptual, pertsonal eta politikoa bihurtu beharra dago.

Espainiako estatuari dagokionez, eremu hau asko hazi da azken hamarraldietan, hainbat ikerketa-talderen jardunak eta aldian-aldian ospatzen diren antropologia-kongresuetan duen presentziak argi uzten dutenez.

Euskal Herriko Unibertsitateko (UPV/EHU) antropologoek uste dugu gaur egun une aproposean gaudela ikasketa hauen egoera aztertu eta elkarrekin eztabaidatzeko, honako aspektuak aintzat hartuz: egiten ari diren ekarpenak, proposamen teoriko-metodologiko ezberdinak, beste diziplinekiko harremanak, dimentsio aplikatua eta gizartean txertatzeko moduak eta aurretik ditugun erronkak.

Horri begira, estatu mailako kongresu bat antolatuko dugu Donostian, 2020ko ekainaren 3, 4 eta 5ean. Lau izango dira ardatz nagusiak: genealogia, teoria, metodologia, eta feminismoarekiko eta gizartearekiko harremanak. Era berean, kongresuak hainbat panel tematiko izango ditu bidean dauden ikerketen emaitzak aurkeztu ahal izateko.

Hurrengo zirkularretan programaren eta izen-ematearen inguruko informazioa zabalduko dugu.